Биология пәнінен білім алушыларды ҰБТ- ға дайындаудың тиімді жолдары» тақырыбында облыстық семинар өтті.

2025 жылдың 5 наурыз күні облыстық оқу-әдістемелік орталығының ұйымдастыруымен биология пәні бойынша ҰБТ-ға дайындық процесін тиімді ұйымдастыру, теория мен практиканы ұштастыру арқылы жоғары нәтижелерге қол жеткізуге мүмкіндік беретін құралдар мен тәсілдерді үйрету, әдістемелік көмек көрсету мақсатында «Биология пәнінен білім алушыларды ҰБТ- ға дайындаудың тиімді жолдары» тақырыбында облыстық семинар өтті. Семинар барысында педагогтерге ҰБТ-да қиындық тудыратын тапсырмаларды шешудің тиімді жолдары, білім алушылардың пәндік, метапәндік және түйінді құзыреттерін дамыту жолдары көрсетіліп, қажетті дидактикалық материалдарға сілтемелер таратылды. Іс-шараға аудандар мен Тараз қалалық білім бөлімдерінің әдіскерлері, биология пәнінің және «Мақсатты мектептер» жобасына енген мектептердің пән мұғалімдері, барлығы 110 педагог қатысты.

ББЖМ-де кездесетін күрделі мәтіндерді талдау жолдары» тақырыбында облыстық семинар өтті.

Жамбыл облысы әкімдігі білім басқармасының оқу-әдістемелік орталығының ұйымдастыруымен 2025 жылдың 25 ақпан күні аудандар мен Тараз қаласының қазақ тілі мен әдебиеті пәнінің мұғалімдерінің кәсіби құзыреттіліктерін арттыру, оларға әдістемелік көмек көрсету мақсатында «ББЖМ-де кездесетін күрделі мәтіндерді талдау жолдары» тақырыбында облыстық семинар өтті. Семинар барысында педагогтерге ББЖМ-де кездесетін күрделі мәтіндерді талдау жолдары, мәтіндерді түсінудегі қиындықтар мен оларды шешу жолдары туралы ақпараттар ұсынылып, әдістемелік көмек көрсетілді. Іс-шараға аудандар мен Тараз қалалық білім бөлімдерінің әдіскерлері, қазақ тілі мен әдебиеті пәнінің және «Мақсатты мектептер» жобасына енген мектептердің пән мұғалімдері, барлығы 120 педагог қатысты.

Облыстық білім беру ұйымдарының арнайы мамандарының арасында «Үздік сабақ» атты сырттай байқау өткізілді.

   Жамбыл облысы әкімдігі білім басқармасының оқу-әдістемелік орталығының ұйымдастыруымен 2025 жылдың 27 ақпан күні білім беру ұйымдарының арнайы мамандарының арасында «Үздік сабақ» атты облыстық сырттай байқау өткізілді. Білім беру ұйымдарының (арнайы мектеп-интернаттар, ППТК, ерекше білім беруді қажет ететін балаларды қолдау кабинеттері, «Асыл Мирас» аутизм және оңалту орталықтары) арнайы мамандарының кәсіби деңгейін көтеру, озық педагогикалық тәжірибелерді жинақтау және тарату мақсатында ұйымдастырылған «Үздік сабақ» атты облыстық сырттай байқауға ерекше білім беруді қажет ететін балаларды оқытудағы тәжірибелерінен 35 бейне сабақ ұсынылып, нәтижесінде үздік сабақтар анықталды. Арнайы мамандардың өзін-өзі дамытуы мен жаңартуды жүзеге асырудың жаңа әдіс-тәсілдерін тиімді қолдануы, сабақ құрылымының жүйелілігі мен нақтылығы, жалпы байқаудың ережесіне сәйкес өткізілген бейне сабақтар бойынша Жамбыл ауданы психологиялық-педагогикалық түзету кабинетінің логопеді Рысқұлбек Толғанай I дәрежелі, Т.Рысқұлов ауданы Ә.Бөкейханов атындағы орта мектебінің ерекше білім беруді қажет ететін балаларды қолдау кабинетінің логопеді Бекназарова Назира II дәрежелі, Тараз қаласы №3 психологиялық-педагогикалық түзету кабинетінің дефектологі Омарова Гулназ, №2 «Болашақ» арнайы мектеп-интернатының тифлопедагогі Садыкова Динара III дәрежелі дипломдармен марапатталды.

«Біртұтас тәрбие:балаларға ұлттық құндылықтар негізінде білім мен тәрбие беру» тақырыбында облыстық тәжірибелік семинар өтті»

2025 жылдың 28 ақпан күні Жамбыл облысы әкімдігі білім басқармасының оқу-әдістемелік орталығының ұйымдастыруымен Жуалы ауданы, №30 Көктөбе орта мектебінің базасында «Біртұтас тәрбие» бағдарламасын жүзеге асыру аясында мектептердің тәрбие жұмысына жауапты педагог қызметкерлеріне әдістемелік көмек көрсету және өзара тәжірибе алмасу мақсатында «Біртұтас тәрбие:балаларға ұлттық құндылықтар негізінде білім мен тәрбие беру» тақырыбындағы облыстық тәжірибелік семинар өткізілді, барлығы 300 ден аса педагог қатыстырылды.

   Семинар жұмысына аудандық білім бөлімдерінің тәрбие жұмысына жауапты әдіскерлері, білім беру ұйымдарының басшылары, директордың тәрбие ісі жөніндегі орынбасарлары, сынып жетекшілер, педагог-психологтар мен әлеуметтік педагогтар шақырылды.

   Іс-шара барысында Жамбыл облысы әкімдігі білім басқармасының оқу-әдістемелік орталықтың бөлім жетекшісі Г.Келдибаеваның «Біртұтас тәрбие» бағдарламасының жүзеге асырылу жағдайы», Жуалы ауданының білім бөлімінің әдістемелік кабинетінің меңгерушісі Е.Джузбаевтың «Біртұтас тәрбие бағдарламасы: әрекет пен нәтиже» тақырыбында баяндамалар, «Құндылықтарға негізделген іс-шараларды ұйымдастыруда жасанды интеллект қосымшаларын пайдалану», «Тұлға қалыптастыруда ұлттық құндылықтар негізінде тәрбие мен білім беруде дәйексөздердің маңызы», «Тәрбие процесін сәтті жүзеге асыру аспектілері» тақырыбында педагогикалық-психологиялық хакатон, «Қамқор» әлеуметтік жобасының іске асырылуы» тақырыптарында шеберлік сыныптар, «Білім алушы бойына құндылықтарды қалыптастырудағы «Ұшқыр ой алаңы» жобасының маңыздылығы», «Ойынға салауатты көзқарас: лудоманияның алдын алу», «Еңбегі адал-жас өрен» жобасы аясында «Мамандық таңдау – маңызды қадам», «Smart bala» жобасы аясында «Өнертапқыштыққа бір қадам» тақырыбында практикалық жұмыстары, «Балалар кітапханасы» жобасы аясында «Кітаптар айналымы» тақырыптарында педагогтердің іс-тәжірибелері көрсетілді, қатысушылар өзара тәжірибе алмасты.

   Сондай-ақ, өздерінің педагогикалық идеяларының маңыздылығын, жаңашылдығын, басқа әдіс-тәсілдерден ерекшелігін көрсетумен қатар, балаларды тәрбиелеу, ата-аналарға қолдау көрсетуге бағытталған іс-шараларды ұйымдастырудың тиімді жолдарын көрсетті. Қатысушылар тәрбие жұмысын ұйымдастыру мен үйлестіру бойынша әдістемелік көмектер алды. Сонымен қатар, «Шабыт» жобасы аясында «Ұлттық құндылықтар - асыл қазына» концерттік бағдарлама қойылды. Семинар барысында «Ұлттық тәрбие - ұлттық құндылық» атты қолөнер бұйымдары мен суреттер көрмесі қойылды.