ОБЛЫСТЫҚ СЕМИНАР-КЕҢЕС ӨТТІ

Жамбыл облысы әкімдігі білім басқармасының оқу-әдістемелік орталығының ұйымдастыруымен мектеп жұмысын жүйелі жоспарлау бойынша мектеп директорларының тәжірибелерін көрсету, ақпараттық-әдістемелік көмектер ұсыну мақсатында 2023 жылдың 19 қазанында «Персоналды басқарудағы кадрлар қызметі және оның әрекет етуіне қойылатын негізгі талаптар» тақырыбында облыстық семинар-кеңес өтті.
Іс-шараға мектеп директорының орынбасарлары, педагогтер, барлығы 150 адам қатысты.
Облыстық семинар-кеңес барысында білім беру ұйымдары директорының орынбасарларына мектеп басшысының функционалдық міндеттері, педагогикалық әдеп қағидалары, мектепті басқару бағытындағы нормативтік құжаттары, мектеп жұмысын жоспарлау жұмыстары, мектепішілік бақылаудың бағыттары мен сапалы орындалуы, білім сапасын арттыру жұмыстарының нәтижелі жүргізілуі, басқарушылық және инновациялық құзіреттілігі туралы директор орынбасарларына кеңінен ақпараттық-әдістемелік көмектер берілді.

«Табысты кітапхана – табысты кітапханашы» тақырыбында облыстық семинар - практикум өтті

Облыстық оқу-әдістемелік орталығының ұйымдастыруымен 2023 жылдың 19 қазан күні білім беру ұйымдарының кітапхана қызметкерлеріне арналған «Табысты кітапхана – табысты кітапханашы» тақырыбында облыстық семинар-практикум өтті.
Іс-шара барысында кітапхана қызметкерлері мектеп кітапханаларының жұмысын ұйымдастыру, қазіргі заманауи кітапханаларға қойылатын талаптар мен әдіс-тәсілдерді игеру, кітапхана оқырмандарына кітап оқуды насихаттау және жандандыру. Кітапхана оқырмандарының оқу құзіреттілігін, медиалық-ақпараттық сауаттылығын қалыптастыру мақсатында тәжірибе алмасты.
Аталған іс-шараға аудандық, Тараз қалалық білім бөлімдерінің әдіскерлері мен 35 кітапхана қызметкерлері қатысты.
Іс-шара соңында 24 қазан кітапханашылар күніне орай облысымыздың тәжірибелі кітапхана қызметкерлері облыстық білім басқармасының және облыстық оқу-әдістемелік орталығының алғыс хаттарымен марапатталды.

«Қазақ тілі», «Қазақ тілі мен әдебиеті» пәндерінен 5-8,10-сыныптарда аралық аттестаттауды өткізудің ерекшеліктері» тақырыбында облыстық онлайн семинар өтті

Жамбыл облысы әкімдігінің білім басқармасы оқу-әдістемелік орталығының ұйымдастыруымен 2023 жылы 19 қазанында білім алушылардың «Қазақ тілі», «Қазақ тілі мен әдебиеті» пәндері бойынша оқу бағдарламасының көлемін меңгеру деңгейін негізгі орта білім берудің мемлекеттік жалпыға міндетті білім беру стандарты талаптарына сәйкес бағалауды меңгерту мақсатында «Қазақ тілі», «Қазақ тілі мен әдебиеті» пәндерінен 5-8,10-сыныптарда аралық аттестаттауды өткізудің ерекшеліктері» тақырыбында облыстық онлайн семинары өтті.
Білім алушылардың оқу аяқталғаннан кейін бір оқу пәнінің бір бөлігінің немесе бүкіл көлемінің мазмұнын игеру сапасын бағалау мақсатында жүргізілетін аралық аттестаттаудың негізгі ерекшелігі мен қойылатын талаптарына тоқталды. Бағалау критерийлері құрастырылатын тапсырмаларға қарай мұғалімдер тарапынан жасалуы қажеттігі айтылды. Емтихан тапсырмаларын құрастыруда мүмкіндігінше төрт дағды қамтылып, емтихан сұрақтарын емтихан алушы педагог құрастыратындығы ескертілді. Аралық аттестаттау тапсырмаларының үлгілерімен таныстырды.
«Қазақ тілі», «Қазақ тілі мен әдебиеті» пәндерінен эссе жазуда тапсырмалардың мазмұны ақпаратты түсіну, мәтіннің құрылымы мен негізгі ойын түсіну, мәтіннің стильдік ерекшелігін тану, проблемалық сұрақтар құрастыру, түрлі дереккөздерден ақпарат ала білу, мәтіндерге салыстырмалы анализ жасау, түсіну және жауап беру, анализ және интерпретация, орфографиялық, орфоэпиялық, пунктуациялық нормаларға құрылғандығы айтылды.
Облыстық онлайн семинарға 155 қазақ тілі мен әдебиеті пәнінің мұғалімдері қатысты.

«Химия пәнінен Ұлттық бірыңғай тестілеу тапсырмаларының ерекшеліктері» тақырыбында облыстық семинар-практикум өтті

2023 жылдың 18 қазан күні облыстық оқу-әдістемелік орталығының ұйымдастыруымен химия пәнінің мұғалімдеріне арналған «Химия пәнінен Ұлттық бірыңғай тестілеу тапсырмаларының ерекшеліктері» тақырыбында облыстық семинар-практикум өтті.
Семинар-практикум барысында педагогтерге Ұлттық бірыңғай тестілеу барысында химия пәні бойынша жұмысты ұйымдастыру жолдары туралы іс-тәжірибелер ұсынылып, тапсырмалардың жаңа үлгілері таныстырылды. Қажетті дидактикалық материалдарға сілтемелер таратылды.
Іс-шараға аудандар мен Тараз қалалық білім бөлімдерінің әдіскерлері, химия пәнінің мұғалімдері, барлығы 130 педагог қатысты.