«М.Жұмабаев шығармалары мен әдеби мұраларын талдаудағы жаңашылдық» атты республикалық дөңгелек үстелі өтті

Жамбыл облысы әкімдігінің білім басқармасы оқу-әдістемелік орталығының ұйымдастыруымен 2023 жылы 26 қыркүйегінде «М.Жұмабаев шығармалары мен әдеби мұраларын талдаудағы жаңашылдық» атты республикалық дөңгелек үстелі өткізілді.
Іс-шараның мақсаты – ақын шығармаларын насихаттауды жандандыру, шығармашылық мұрасын оқыту барысында жас ұрпақты отансүйгіштікке, еңбекқорлыққа, ұлттық құндылықтарды құрметтеуге тәрбиелеу.
Республикалық дөңгелек үстелінің спикері Шымкент қаласы, №133 жалпы орта білім беретін мектебінің қазақ тілі мен әдебиеті пәнінің мұғалімі Жақып Гүлдана Хабибуллақызы «М.Жұмабаев шығармаларындағы түркішілдік сарын» тақырыбында ой бөлісіп, танымдық сипатына талдау жасады. Іс-шара барысында облысымыздың тәжірибелі педагогтері Мағжанның қазақ лирикасындағы орны, ақынның еңбектеріндегі жалпыадамзаттық құндылықтарға, гуманистік, демократтық көзқарастарына шолу жасады.
Мағжан педагогикасының бүгінгі білім беру жүйесімен байланысының маңыздылығы және поэмаларындағы ұрпақтар сабақтастығы, өлеңдеріндегі патриотизм мен жаңаша көзқарас тұрғысынан ой бөлісті. Солтүстік Қазақстан облысы, Мағжан Жұмабаев ауданы, Сарытомар ауылындағы «Мағжан Жұмабаев мұражайына» онлайн саяхат жасалды.
Республикалық дөңгелек үстеліне 275 (62 педагог оффлайн, 213 педагог онлайн) қазақ тілі мен әдебиеті пәнінің мұғалімдері қатысты.
#Мағжан130

«ҰБТ-2023» ҚОРЫТЫНДЫСЫ БОЙЫНША ОБЛЫСТЫҚ КЕҢЕС ӨТТІ

2023 жылдың 22 қыркүйегінде Жамбыл облысы әкімдігінің білім басқармасының ұйымдастыруымен М.Х.Дулати атындағы Тараз өңірлік университетінің базасында «Білім сапасын сыртқы бағалау: ҰБТ-дің тақырыптық талдауы», «Мектепішілік бақылау жоспарының жүйелі және сапалы жүргізілуі» тақырыптарында облыстық кеңес өтті.
Облыстық кеңеске Ұлттық тестілеу орталығының директоры Р.Емелбаев, Жамбыл облысының білім саласында сапаны қамтамасыз ету департаментінің басшысы Д.Ускумбаева, Жамбыл облысы әкімдігінің білім басқармасының басшысы М.Өмірбек, облыстық оқу-әдістемелік орталықтың әдіскерлері, аудандар мен Тараз қалалық білім бөлімдерінің басшылары, ҰБТ-ге жауапты мамандар, әдістемелік кабинет меңгерушілері, мектеп директорлары мен оқу ісі жөніндегі орынбасарлары, барлығы 500 педагог қызметкер қатысты.
Кеңес барысында Ұлттық тестілеу орталығының директоры Емелбаев Руслан Тохтарбекұлы кеңеске қатысушыларға 2023 жылғы Ұлттық бірыңғай тестілеудің қорытындысы бойынша толық ақпарат берді. Іс-шараға қатысушылар мектепішілік бақылауды ұйымдастыру бойынша ақпараттық-әдістемелік көмек алды.

ЫНТЫМАҚ, БІРЛІК, КЕЛІСІМ – ЕЛ ТҰРАҚТЫЛЫҒЫНЫҢ НЕГІЗІ» тақырыбында облыстық вебинар өтті

2023 жылдың 22 қыркүйек күні облыстық оқу-әдістемелік орталығы мен Қордай аудандық білім бөлімінің ұйымдастыруымен этносаралық қатынастар саласындағы кешенді тәсілді қамтамасыз ету жөніндегі 2023 жылға арналған ведомствоаралық жоспарға сәйкес, өзге ұлт өкілдерінің қатысуымен Қордай ауданының педагогтері мен 9-11 сынып оқушыларына арналған облыстық вебинар өтті.
Вебинар барысында педагогтер мен білім алушылар арасында толерантты көзқарасты қалыптастыру, түрлі мәдениеттер мен полиэтникалық қазақстандық қоғамдастық тарихына құрмет көрсету бойынша ой-пікірлер айтылды.
Іс-шараға барлығы 44 педагог, 500 оқушы қатысты.

«Өнерлі бала» атты республикалық балалар шығармашылығы байқауы өтті

Ағымдағы жылдың тамыз айында ҚР ОҒМ «Балаларды ерте дамыту институты» республикалық мемлекеттік мекемесінің ұйымдастыруымен мектепке дейінгі ұйымдар арасында «Өнерлі бала» атты республикалық балалар шығармашылығы байқауы өтті.
Аталған іс-шараға облыстық кезеңнен жеңімпаз атанған Тараз қаласының №5 «Ақ желкен» және №12 бөбекжай-бақшаларының жұмыстары ұсынылған болатын.
Республикалық байқау нәтижесі бойынша №5 «Ақ желкен» бөбекжай-бақшасы «Шебер орындаушы» номинациясын, №12 бөбекжай-бақшасы «Үздік балалар костюмі» номинациясын иеленді.
Педагогтерді жеңісімен құттықтаймыз!!!