Халықаралық зерттеулер

Қымбатты ұстаздар! Құрметті мектеп түлектері! Қадірлі ата - аналар!

Сіздерді бүгінгі қазақстандық түлектердің мектеппен қоштасуға арналған соңғы қоңырау мерекесімен шын жүректен құттықтаймыз!
Осыдан 11 жыл бұрын тарыдай болып мектеп табалдырығын аттаған балалар бүгін таудай болып үлкен өмірге алғашқы қадамдарын басқалы отыр.
Бүгін түлектер өздерінің 11 жыл білім алған алтын ұяларымен қоштасса, ұстаздар өздерінің сүйікті шәкірттерін үлкен өмір жолына аттандыруда.
Биылғы оқу жылындағы нәтижеміз жоғары. Бұған дәлел, біздің оқушылар республикалық Олимпиада 7-жыл, ғылыми жобалар байқауларында 6-жыл қатарынан командалық бірінші орынды иеленді. Ал халықаралық білім сайыстарында 150 оқушымыз жүлдегер болып отыр. Жалпы биыл облыс мектептерін 9611 түлек бітірді. Оның 63 пайызы, яғни 6 мыңнан астам оқушы Ұлттық бірыңғай тестін тапсыруға ниетті.
Алда жас түлектерді үлкен сынақ күтіп тұр. Барлықтарыңызға Ұлттық Бірыңғай тестілеуден абыроймен өтіп, Қазақстанымыздың білікті маманы атануларыңызға тілектеспіз. Ал мектептегі алғашқы жылдарын сәтті аяқтап, бірінші сыныптан екінші сыныпқа аяқ басқан жас бүлдіршіндер мен барлық мектеп оқушыларына жазғы демалыстарын жақсы өткізіп, күш жинап, жайдары көңіл күймен жаңа оқу жылына оралуларыңызға тілектеспіз.
Үлкен өмірге қадам басқан жас түлектерге тек қана сәттілік тілейміз. Жолдарың әрдайым ашық болсын!

«ТІРЕК МЕКТЕП ЖАҒДАЙЫНДА ИННОВАЦИЯЛЫҚ БІЛІМ БЕРУ ҮДЕРІСІН БАСҚАРУДЫҢ ПЕДАГОГИКАЛЫҚ ШАРТТАРЫ» ТАҚЫРЫБЫНДА ОБЛЫСТЫҚ РЕСУРСТЫҚ ОРТАЛЫҚТАР МЕН ШЖМ-ІҢ БАСШЫЛАРЫНА АРНАЛҒАН ҒЫЛЫМИ-ТӘЖІРИБЕЛІК СЕМИНАР ӨТТІ.

2018 жылдың 18 мамыр күні Т.Рысқұлов ауданындағы Мұхтар Әуезов атындағы тірек мектебінің (РО) базасында «Тірек мектеп жағдайында инновациялық білім беру үдерісін басқарудың педагогикалық шарттары» тақырыбында ғылыми-тәжірибелік семинар өтті.

Семинар жұмысына Ы.Алтынсарин атындағы Ұлттық білім академиясы жаратылыстану-математикалық білім беру зертханасының меңгерушісі, доцент Ш. М. Шуиншина, аудандық, білім бөлімдерінің әдіскерлері, тірек мектептердің (ресурстық орталықтардың), ШЖМ-нің басшылары, барлығы 60 педагог қатысты.

Семинарға қатысушылар тірек мектебі жағдайында инновациялық білім беру үдерісін басқарудың педагогикалық шарттарымен танысып, өзекті мәселелерді, ұсыныстарды, ескертулерді ортаға салып пікір алмасты.

Толығырақ: ҒЫЛЫМИ-ТӘЖІРИБЕЛІК СЕМИНАР ӨТТІ

РЕСПУБЛИКАЛЫҚ ОЛИМПИАДАДАН 9 ҰСТАЗ ЖЕҢІСПЕН ОРАЛДЫ

2018 жылдың 3-5-мамыр аралығында білім және ғылым Министрлігінің «Дарын» Республикалық ғылыми-тәжірибелік орталығының ұйытқы болуымен Шығыс Қазақстан облысы Семей қаласының М.Әуезов атындағы педагогикалық колледжі базасында «Дарынды балаға – талантты ұстаз» атты ХІІІ республикалық педагогикалық олимпиада өтті.

Жас педагогтардың шығармашылық әлеуетін және өзін-өзі дамытуына жағдай жасау, білім беру жүйесін жетілдіруге болашақ мұғалімдердің кәсіби көзқарасын қалыптастыру мақсатында өткен республикалық педагогикалық олимпиадаға облыстан 11 жас маман қатысып, 9-ы жеңімпаз атанды.

Байқау қорытындысы бойынша І-ші орынды Меркі ауданы №1 орта мектебінің бастауыш сынып мұғалімі А.Жүндібаева жеңіп алды. Ал Байзақ ауданы Сарыкемер мектеп-гимназиясының қазақ тілі мен әдебиеті пәнінің мұғалімі А.Баймамырова, Жамбыл ауданы Ә.Ысмайылұлы атындағы орта мектебінің география пәнінің мұғалімі М.Сүйінбеков, Меркі ауданы №9 В.Савва атындағы орта мектебінің орыс тілі мен әдебиеті пәнінің мұғалімі Р.Идрисова, №5 Ақарал орта мектебінің тарих пәнінің мұғалімі А.Джадраев, №17 И.Трубицын атындағы орта мектебінің тарих пәнінің мұғалімі Ж.Тұрсынов, Мойынқұм ауданы Жамбыл атындағы мектеп-гимназиясының қазақ тілі мен әдебиеті пәнінің мұғалімі Ж.Алменова, Талас ауданы Ш.Уалиханов атындағы орта мектебінің физика пәнінің мұғалімі А.Тайшикова жүлделі ІІІ орындарды иеленді. Сондай-ақ Тараз қаласы Айша бибі атындағы дарынды қыз балаларға арналған мамандандырылған «БІЛІМ-ИННОВАЦИЯ» мектеп-интернатының қазақ тілі мен әдебиеті пәнінің мұғалімі П.Тажибаева номинация иегері атанды.

Сайыс жеңімпаздары «Дарын» Республикалық ғылыми-тәжірибелік орталығының дипломдарымен және бағалы сыйлықтарымен марапатталды.

Педагогтарымызды жеңістерімен құттықтаймыз!

МЕКТЕПАЛДЫ ДАЯРЛЫҚТАҒЫ БІЛІМ БЕРУДІҢ МАЗМҰНЫ МЕН САПАСЫН АРТТЫРУДЫҢ ТИІМДІ ЖОЛДАРЫ

Ағымддағы жылдың 4 мамырында Жамбыл облысы әкімдігі білім басқармасының оқу-әдістемелік кабинетінің «Мектепке дейінгі мекемелер, мектепалды даярлық және «Өзін-өзі тану» пәні бөлімінің ұйымдастыруымен Жуалы ауданы Б.Момышұлы ауылындағы №15 орта мектептің базасында мектепалды даярлық сынып педагогтеріне арналған «Мектепалды даярлықтағы білім берудің мазмұны мен сапасын арттырудың тиімді жолдары» тақырыбында мектепалды даярлық сынып педагогтарына арналған аймақтық семинар-практикум өтті.

Семинарға 9 аудан және Тараз қаласынан 26 педагог қатысып, «Кембридждік әдіс - тәсілдер, мектепалды даярлықта Постер қорғау» арқылы мектепалды даярлықтағы балалардың танымдық процесін, шығармашылық және интеллектуалдық қабілеттерін дамыту бойынша іс-тәжірибе алмасты.
Іс-шара барысында аудандағы мектепалды даярлық топ педагогтері ұйымдастырылған оқу-қызметтерін көрсетіп, мектеп психологі А.Сабырқызы «Көңілі көтеріңкі ұстаздың, әрбір еңбегі де жемісті!» тақырыбында тренинг жүргізді.
Семинар-практикумның қорытынды бөлімінде қатысушылармен кері байланыс жүргізіліп, іс-шараға белсене қатысқан мектепалды даярлық топ педагогтарына сертификаттар берілді.

ДАРЫНДЫ БАЛАЛАРҒА – ТАЛАНТТЫ ҰСТАЗ

Үстіміздегі жылдың 6 сәуірінде жалпы білім беретін орта мектептердегі жас мамандардың қатысуымен «Дарынды балаларға – талантты ұстаз» атты педагогикалық олимпиада өткізілді.

Олимпиада жас ұстаздардың педагогикалық шығармашылық нәтижелерімен, жобаларымен, педагогикалық идеяларымен танысу, ұстаздардың жеке шығармашылығының кеңістігін шоғырландыруға, шығармашылық ізденушілік бағытын таңдауға, педагогикалық өз ойын білдіру тәсілдерін және жеке шығармашылық жолын табуға мүмкіндік жасау, педагог кәсібінің мәртебесін арттыру және шығармашыл педагогтарды анықтау, оларға қолдау көрсету мақсатында ұйымдатырылды.
Іс-шараға 16 жас маман қатысып, 11-і жеңімпаз атанды. Жеңімпаздар педагогтар ағымдағы жылдың 4-5 мамыр аралығында Семей қаласында өтетін республикалық олимпиадаға қатысады.

Толығырақ: ДАРЫНДЫ БАЛАЛАРҒА – ТАЛАНТТЫ ҰСТАЗ