«Жаңа ақпараттық  технология құралдары арқылы бастауыш сынып оқушыларының құзыреттілігін қалыптастыру  жолдары»   тақырыбында облыстық  вебинар  өтті

       Жамбыл облысы әкімдігі білім басқармасының оқу-әдістемелік кабинеті 2020  жылдың 25 желтоқсан  күні  аудандық (қалалық) білім бөлімдерінің бастауыш сынып әдіскерлері мен  бастауыш сынып мұғалімдері үшін «Жаңа ақпараттық  технология құралдары арқылы бастауыш сынып оқушыларының құзыреттілігін қалыптастыру  жолдары»   тақырыбында облыстық  вебинар  өткізілді.

«Zооm» платформасында  өткен іс-шараға 235 педагог қатысты. 

Іс-шара қатысушылары  оқыту мен оқуда ақпараттық-коммуникациялық технологияларды  қолдану, АКТ құралдарын оқу үрдісінде тиімді пайдалану жолдары,  білімнің технологиялық аспектісі,  интернет ресурстарды пайдалану артықшылықтары, білім беру платформалары  арқылы  жүргізілетін жұмыс түрлері  бойынша тәжірибе алмасты.

«Әл-Фараби – өркениет философы» тақырыбында облыстық   ғылыми-практикалық конференция өтті

2020 жылдың 24 желтоқсан күні Әбу Насыр Әл-Фарабидің  1150 жылдығына орай «Әл-Фараби – өркениет философы» тақырыбында облыстық ғылыми-практикалық конференция өтті.

Іс-шараның мақсаты – Түркі әлемінің ғұламалары мен ойшылдарының бірегей тұлғасы Әбу Насыр Әл-Фарабидің өмір жолын,  ғылым, білім салаларына қосқан үлесін насихаттау, еңбектерін зерттеу.

Іс-шараға Қызылорда облысы «Болашақ» университетінің «Филология, журналистика» кафедрасының аға оқытушысы, ф.ғ.к. Т.Медетбаев, М.Х.Дулати атындағы Тараз өңірлік университетінің «Әлеуметтік-гуманитарлық пәндер» кафедрасының меңгерушісі, филос.ғ.к., доцент Г.Нурадин, «Философия және саясаттану» кафедрасының доценті, филос.ғ.к. Б.Таирова, «Қазақ тілі мен әдебиеті» кафедрасының доценті, ф.ғ.к. Р.Саламатова қатысты.

Облыстық ғылыми-практикалық конференция барысында педагогтарға  Әл-Фарабидің педагогикалық ғылыми көзқарастары, ғылыми-философиялық еңбектері, трактаттары, ғылым салаларына қосқан үлесі, даналық негіздері туралы ақпарат беріліп, дидактикалық материалдар таратылды.

Іс-шараға жоғары оқу орындарының ғалымдары, аудандар мен Тараз қалалық білім бөлімдерінен 22 әдіскер, 139 тарих, 139 қазақ тілі мен әдебиеті пәндерінің мұғалімі, барлығы 300 педагог қатысты.

Облыстық онлайн-жиналыс өтті

2020 жылдың 24 желтоқсан күні Жамбыл облысы әкімдігі білім басқармасының оқу-әдістемелік  кабинетінің  ұйымдастыруымен «Қазақстан Республикасының білім беру және ғылымды дамытудың 2020-2025 жылдарға арналған мемлекеттік бағдарламасының орындалуы» бойынша  аудандар мен Тараз қаласының әдістемелік кабинеті меңгерушілерінің қатысуымен    онлайн-жиналыс өтті. Онлайн-жиналысқа 12 адам қатысты.

Онлайн-жиналыс барысында облыстық оқу-әдістемелік кабинетінің басшысы Ш.Усерова аудандар мен Тараз қаласының әдістемелік кабинет меңгерушілеріне  Қазақстан Республикасының білім беру және ғылымды дамытудың 2020-2025 жылдарға арналған мемлекеттік бағдарламасының орындалуы және білім мекемелерінің педагогтерін әдістемелік қолдау жұмыстарын инновациялық бағытта дамыту бойынша бірқатар  жұмыстардың  жүйелі жүргізілуі туралы  ұсыныстар айтты.

Сондай-ақ, Байзақ, Т.Рысқұлов аудандары білім бөлімдерінің әдістемелік кабинет меңгерушілері  Қазақстан  Республикасында  білім беруді және ғылымды  дамытудың 2020-2025  жылдарға  арналған  мемлекеттік бағдарламасын  бекіту  аясында әдістемелік кабинеттердің жұмысы туралы  және алдағы уақытта мемлекеттік бағдарламалар аясында жүргізілетін жұмыстарының   орындалуы туралы баяндап, қатысушылармен өз іс-тәжірибелерімен бөлісті.

«Өзін-өзі тану» рухани-адамгершілік білім беру бағдарламасын жүзеге асыру: Ізденіс. Тәжірибе. Нәтиже» тақырыбында облыстық онлайн-кеңес өтті

Облыстық оқу-әдістемелік кабинетінің ұйымдастыруымен «Өзін-өзі тану» пәні мұғалімдерінің кәсіби құзіреттіліктерін арттыру, ақпараттық-әдістемелік көмек көрсету мақсатында 2020 жылдың 23 желтоқсан күні    «Өзін-өзі тану» рухани-адамгершілік білім беру бағдарламасын жүзеге асыру: Ізденіс. Тәжірибе. Нәтиже» тақырыбында облыстық онлайн-кеңес өтті.

Онлайн-кеңес барысында педагогтарға жобалық жұмысты жүйелеп жүргізудің жолдарын анықтау, «Өзін-өзі тану» пәнін интеграциялап оқыту бағытындағы жұмыс түрлерімен танысу, қашықтан оқыту жағдайында желілік қауымдастықта «Өзін-өзі тану» сабағын ұйымдастырудың тиімді әдіс-тәсілдері туралы ақпараттық-әдістемелік көмек көрсетілді.

Іс шараға аудандар мен Тараз қалалық білім бөлімдерінен 11 әдіскер,   143 «Өзін-өзі тану» пәні мұғалімі, барлығы 154 педагог қатысты.